رثاء ( محمد صالح الجابري)

إذا رحت للطايف أبكي محمّد
ولا عدت منها أرجع وأنا أبكيه

حيثه صديقي عليه أتوجّد
إذا جيت أسافر ضروري أناديه

ما كان يجيني سفر واتردّد
لأن الخوي جاهز اللي أخاويه

إن قلت نمشي مشى ما تشدّد
وإن قلت نرجع ما قال وش فيه

دمّه خفيف للخوي يتودّد
يلاطف خويّه ولا هو يجافيه

وإن ما نوى يضحكك ما تحدّد
الكل يضحك ولو هم معاتيه

وإن هو زعل ما يجيك يتهدّد
شويّة دقايق ولا كنّ شيّ فيه

يبلعها لو إنها ما تعدّد
لا له بشَرْهة ولا في تشاريه

كريم و سخي ما يحب يتمجّد
من جاه كل اللي عنده بيعطيه

إن تسأله كيف حالك تحمّد
ما علّمك إن فَقره يباريه

ما قط شفته في يوم يتشحّد
نفسه عفيفة عسى الله يجازيه

وإن ما طلع كَشْتة(ن) ما تمدّد
يجري معك كل شيّ(ن) يسويه

يارب تصلحله صالح وأحمد
والابن ماجد يارب تهديه

رحمة عليه رحمة(ن) ما تبدّد
ومزون تمطر على القبر تسقيه

عز الله إنا بنلحق مؤكد
كل(ن) في يومه يناديه داعيه