القلب يا محمد على البر ملهوف - ثامر راشد المنصوري

القلب يا محمد على البر ملهوف
وديرة بليا بر يا خوي تنعاف

بالطير و المقناص هالقلب مشغوف
واقع وخذه الوقت ما عاد ينشاف

اشوف صورة لك مع الحر و اشوف
صورة مع ربعي مع صيد بأصناف

وصور عقبها القلب ضايق ومخسوف
خسف الزلالزل للمدن عقبها انصاف

طالبك بالي تحج له الناس و تطوف
بإعداد منهو حج هالبيت ومن طاف

انك تسوي بي من اليوم معروف
بلي سنينة عقب فرقاكم عجاف

لا ترسل صور لا ولا ترسل حروف
عن صيدها الي غرفها غرف مجداف

وليا تناثر ريشها وعينك تشوف
وشفت النشاما عقبها تهتف هتاف

اكتم ما شافت عينك اليوم بالجوف
واليا نشدتك قول لي البر ينعاف

و ان شفتني انشدك منشاد ملقوف
عطني السوالف وخلها بيننا خفاف

لا تكثر شروحك و هالعين ما تشوف
خايف يصيد العين من دمعها إتلاف

© 2024 - موقع الشعر