عقب الملاقى في زهور وبساتين
وحدي غريق ومع خياله أحاكيه
دمي بعد فرقاك عاف الشرايين
محتاج بلسم من شفاياك تعطيه
خليتني رسمه بليا تلاوين
مبهم وضاعت في دروبك معانيه
شمسي بعدها غايبه لين هاللحين
تنطر شروقك حظ من هو يخاويه
أصبحت بعدك مركب(ن) تايه أسنين
بسباب موج الشوق تاهت موانيه
ياهيه ماترحم قليبن مسيكين
والله ترى هجرك يزود بلاويه
ماهو بناقص طعنتك يا اكحل العين
يكفيه طعنات الزمان وخوافيه
صاب المرض جسمي وحالي غدى شين
والموت جاني قربت لي خطاويه
أنت الطبيب وعلتي بين قوسين
صدك وكثر جفاك حطم هقاويه
عالج جروحي وأستمع بين ضلعين
قلب(ن) كسير(ن) وصلك أخر رجاويه
ياليت للعشاق قاضي قوانين
لارفع على محبوب قلبي وأقاضيه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين