أحتاجه أكثر من الميّ

يا وقتي اللي راح و ين انت غادي
وَقّف دقيقة ودي آشوفه اشويّ

أتعَبْتني أركض وراك وأنادي
أتوسلك يا وقت لا تنتهي عَيّ

في شوفته يا فرحتي يا مرادي
الشوف لعيوني وللخافق الفَيّ

به من صفات الحُور زاهي وهادي
فتّان طاغي بالحلا والغنج شَيّ

لا شفته انساني واهيم بسهادي
وان غاب اخيله في دجى عمري الضيّ

رعبوب زاهي من مرابي بلادي
غير البشر عندي و لا يشبهه زيّ

غير العذارى في حنايا فؤادي
يا والله انّه طاوياً مهجتي طيّ

ان قلت عادي لا حشا غير عادي
ماريّته أحتاجه أكثَر من المَيّ

في قبلته جوري و نرجس و كادي
تروي معاليق الوله بالحشى رَيّ

من ثغره المسك استقى ثم سادي
واثمل خفوقي وامتلك كل شي بيّ

أتنفسّه عمري و يثْمر حصادي
يدهَل شجوني واقتنع أنني حَيّ