بــلاد الـمـجـد

أحبك موت واتنفس من أنفاسك هوىً نسناس
وروحي فيك اسميها سكن يا أغلى حبايبها

أضمك حيل في صدري ثراك ينافس الألماس
أنا اشهد جنة الدنيا علىَ أرضك رحايبها

اموت اموت واحيابك غلاك يترجم الإحساس
لك الله يا بعد روحي ما غيرك للورى يبها

سعوديه ياأرض الطيب .. سعوديه رفيعة راس
سعوديه و لوتدرون وش تحمل سحايبها

مزون الخير للضامي تبلل شفته ..لا باس
تواسي خافق ٍ مجروح إذا هبت هبايبها

عليها من وصوف الحسن ما يخطف قلوب الناس
من أقصاها إلى أدناها على وجنة شعايبها

آمان وأمن واستقرار ..فيها نطرد الوسواس
حبيبة شعبها الوافي ولا تنسى قرايبها

عليها حاكم ٍ عادل أبو متعب عريب الساس
ابن عبد العزيز اللي دفع عنها نوايبها

حكيم الراي له نظره .. تْخَطّينا حدود الياس
فعوله تشهد بطيبه كبرنا من سبايبها

وعذب الصيت ابو خالد إذا بفخر بدون قياس
جيوش الشعر لسموّه تحت أمره ركايبها

قصيد ٍ ما رفع راسه لبو خالد ترى ينداس
وآنا بالشعر لي قاف ٍ تشوف اسمى عجايبها

مدام اني سعوديه لبست العز خير لباس
وثوبي ما وصل طرفه دني النفس خايبها

أبرفع راية ٍ البيرق واخط بد مي القرطاس
أدون بالقلم رسم ٍ يجمّد شوف عايبها

بلادي خيرها وافي وتشهد طيبها الأنفاس
يمين ٍ بالعطا تجزل يمين ٍعاش نايبها

حماك الله ي(بلادي) من الباغين والأنجاس
سعوديه( بلاد المجد) عزّ الله كتا يبها