خل العيون اللي تداعب سهرهـا - خليف الوهيداني

خل العيون اللي تداعب سهرها
تعرف باليا اسباب ماتسهر العين

والنفس فيه أمور سر تحشرها
يعلم بها اللي له عباده مصلين

عينآ شكت كثر السهر من قهرها
وعينآ شكت فرقا ولايف وغالين

وعينآ شقاها بس يوم أبشهرها
وعينآ شقاها طول الايام ياحسين

وعينآ يهل الدمع خدعه بصرها
حيله وتغوي ناس ماهو بدارين

وعينآ تبين حزنها في نظرها
والحزن بين في عيون المساكين

ناسآ هموم الوقت غاصت بحرها
وناسآ تسابق بالشعر للملايين

وناسآ تقدم عذرها وتعذرها
وناسآ عن العذر الحقيقي بعيدين

وناسآ تعيش وتنبصط في ديرها
لو ان ماهو منك ناسآ قريبين

وناسآ تعيف اديارها وتهجرها
لو انهم اقرب من الربع الادنين

الله من همآ جنوده نشرها
في ضامري وشعل بي الهم والبين

حتى دموعي فوق خدي نثرها
همآ قسم قلبي مع النصف قسمين

من الظروف اللي تزايد خطرها
منها التحرا الشين يقدم على الزين

عزي لمن حظه حياته دمرها
ماله تصرف لايسار(ن)والايمين

وليا بغاله حاجت(ن)ماقدرها
عنها حداه القل ومقاسط الدين

وين الرجال اللي سعد من نحرها
اللي بحزات الشدايد مزابين

اللي بفعل الطيب كل(ن)شكرها
أهل الوجيه الفالحه والكريمين

اللي لكل الناس ياصل خبرها
والهم فعول الطيب رمز وعناوين

مثل الوسوم اللي كريم(ن)مطرها
لاجت عقب ماكمل الوسم يومين

وسقت ديار(ن)طال فيها دهرها
وعقب الدهر صارت تشابه بساتين

© 2024 - موقع الشعر