حنّا عنزه

لو كان بالداره رجالٍ حلاحيل
تعرف تقول الحق من دون داره

مير البلا لاصار جمعة مهابيل
كلٍ يزيف بالحقايق عباره

والحق بيّن واضحٍ كنه سهيل
لو حرفو سود النوايا مساره

يبون قلب المجد..وكسب المحاصيل
لا بارك الله بالردي وأفتخاره

ياهيه ياللي مبدل الحق تبديل
أقضب مكانك يازعيم الثواره

وين انت عن قولٍ بروقه مخاييل
ألا عنزه مامثلها بالجساره

حنّا عنزه روس الرجال المشاكيل
أهل المواقف والكرم والنعاره

حنّا عنزه لاحان وقت المفاتيل
عدونا نرميه في وسط ناره

حنّا عنزه أهل السيوف المصاقيل
نشرب دلال العز ونشن غاره

حنّا عنزه من دون زيفاً وتظليل
نملك زمام المرجله والسطاره

وبيوتنا من فضل ربي مداهيل
مبطي وحنّا كاسبين الصداره

تاريخنا ماصار مثله ولاقيل
بين القبايل مجدنا كالمناره

لا ماكسبنا مجدنا بالتماثيل
ومحنا من اللي مجدهم بأستعاره

والله ماودي بكشف التفاصيل
هذي شراره لاتزود الشراره

هذا وأنا ماقول بالناس تقليل
في كل رجلٍ حشمته وأقتداره

وكل القبايل فيهم النعم تدبيل
والكل منهم يستحق الأشاره