يالله انا اللي طالبك تغفر زللنا يابصير
حيثك بصير وحالتي تعلم خفايا حالها
يارب ذي دعوه فقير ينثر الدمعه جهير
من السنين الموجعه لا قدر الله فالها
صار الزمن يلعب بنا من يد نذير ليد نذير
وحنا سواة الهايشة تاكل فطور عيالها
صرنا مثل خرز المسابح كل حبه في غدير
ومن يجمع اخراز المسابح لانقطع محبالها
واقول قوموا ياعرب يكفي دموع ام الاسير
اللي هدم جيش اليهودي بيتها واجتالها
قوموا نبي نرفع عمد بيت الحقايق للصغير
وندك دار القدس لين الله يعز عيالها
يلعب بنا بوش الابن ويلعب بنا بوش الكبير
من قندهار الى العراق الى متى يارجالها
وموت الحريري رايكم بانه من الحكم الاخير
لا والله الا موتته شبت على خيالها
ومادري وش اللي حدنا ماناخذ بثار الغرير
نسكت ويفضح صمتنا نخوه عرب وابطالها
وابسرد القصه الين الله يجملني بخير
واذكر معارك حاسمه هذا رصيد افعالها
ربي نصرنا في بدر وحنا مع الجمع الغفير
هذي هي اول نصرة قد لاح فيه هلالها
والقادسية عقبها شبت على الفرس النذير
وذات السلاسل بذكره لو كان ماحدن قالها
وتشهد لنا اليرموك ضد الروم واكتب يابصير
مادامها ماطمنت نذر علي لا اسعى لها
والقوط في وادي لكة ماعينوا بالله خير
والاندلس من كف طارق شمخن اجبالها
وياعين جالوت اشهدي واستنزفي ذكرى المصير
هذي هي امجاد العرب قوموا نبوج سهالها
وماعاد ينفع بالزمن كود المشاعر تستثير
واقول قوموا ياعرب حنا لها حنا لها
وان ماوقفنا بالزمن عشنا مثل عيش البعير
لاجاع ياخذ من سنامه مابغى يكتالها
والخاتمه صلوا عدد صب المطر جوف الغدير
على النبي الهاشمي اخير من صلى بها

حقوق النشر محفوظة لـشاعر

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2004 - 2019 - موقع الشعر