إلى قبيلة عنزه مع التحيه - رائد العالي

عند الرجال اللي لهم صيت وافعال
ومجدٍ عظيم من العصور القديمه

حليت من دار الصناديد الابطال
تدفعني امالي وقو العزيمه

لوّ المسافه كايده والسفر طال
حصلت ناسٍ معرفتهم غنيمه

وقفاتهم تسوى ملايين الاموال
واللي نخاهم مارجع بالهزيمه

الاد وايل للوفا مضرب امثال
منصى الكسير اللي زمانه مضيمه

والله وسبع انعام والحق ينقال
كلمة وفا من صدق ماهي ظليمه

نخيتهم في موقفي نخوة رجال
واوفو عساهم للبقا والحشيمه

دمتو على خير المواقف والاحوال
والطيب فيكم ياعسى الله يديمه

دمتو وفا دمتو شرف عبر الاجيال
دمتو كرم يااهل اليدين الكريمه

عسى ديركم فوقها الغيث همّال
يسقي وطاها طيلة العام ديمه

الله يجنبكم مقادير الاهوال
ويجير كل اهل النوايا السليمه

اقولها وانا عتيبي ليا قال
سمعو له اهل الطيب شيمه وقيمه

والله ماانقص للرياجيل مثقال
ولا نصيت الطيبين بسقيمه

© 2024 - موقع الشعر