انخى عنزه

يا الله ياربي دعيناك بالحال
ونرفع يدينا بالدعاء للطوايل

تفرج لمن هو بالسجن ضايق البال
همه كبير وعايشاً بالثقايل

والدمع من عينه من الضيق ينسال
توه صغير ولأكبر الهم شايل

من غلطةٍ صارت بلاقصد وأقبال
غلطه وصارت ماسبقها غلايل

شياً مقدر والقدر يفعل أفعال
ومسجلٍ كل ماحصل بالسجايل

صار الخطا وأنكسرت أحلام وآمال
ومعه أبتدأ درب الشقاء والعلايل

مسجون عبدالله من سنيناً طوال
وضاعة حياته وأوثقوه الحبايل

ومخيراً مابين هماً وغربال
ثنتين فيهن ماتفيد البدايل

مطلوب في ديه ملايين الأموال
ومحدده في وقتها بالدلايل

أما دفعها كلها بكل الأحوال
والا يساق..وتنتظره الصقايل

أمه تشوف ترقب الحال بأهوال
تبصر ولكن مابيديها وسايل

وأبوه همه شايله كنّه جبال
والهم يكبر والعذاب يتهايل

حكم الشريعه..مالهم فيه مدخال
ألا الدعاء..وأهل التقى والفضايل

وياباغياً للخير..لأفعاله أشكال
وعتق رقبه..مرجحاً بالمكايل

أقبل وشارك..مع هل الخير بالمال
وكل مادفعته يندبل لك دبايل

وأنخى عنزه..أهل المواقف والأفعال
أهل الفعول الطيبه والمثايل

هذا ولدكم بالسجن حالته حال
والوقت يمضي مابقى به صمايل

صفّو معه صفة صناديد وأبطال
صفة حميّا ساسها الجد وايل

تكاتفو ياعزوتي وقت الأثقال
حنا لها..ونطولها بالفعايل

يومنها وقت المعارك والأقبال
فزنا بها بأفعالنا والصقايل

(ولعيون حصه)بيننا تضرب أمثال
وموثقاً تاريخها بالسجايل

وحنا وراها نلحق المجد بأفعال
ونرجع نعيد اللي مضى بالأوايل

وبأذن الولي..كان أنها بجمع الأموال
نقدر عليها واكبرالهم زايل