اخذ الكلام اللي عليه العلم ! - عبدالله العبدلي

أخذ الكلام اللي عليه العلم
ما ضيّق صدور الرجال ،، ارخوم
 
ما نلتفت يم الوجيه البلم
مقامنا عن مثلهم محشوم
 
يامن يسوي من هروجه فلم
ويِحط ربعه بالعلوم نجوم
 
يصيح في وقت الرخا و السلم
بالهرج ( حر ) وبالمواقف ( بوم )
 
وحنّا ليا طالت يدين الظلم
نقطع يديه وننصر المظلوم
 
عند الغضب نلبس ثياب الحلم
وعند المواقف نحتزم ونقوم
 
نصبر على جور الليال الدلم
ونذبح لجل عين الليالي ( يوم )
 
إمن الكرم فينا نعز السلم
حتى ولو إن الضيوف هموم
 
كفوفنا في كل حزّه ولم
على الوفا و الطيب تبقا دوم
 
ومن دوّر الزلات يحلم حلم
ماهو بلاقي لو يحط الزوم

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر