مساجله مع الشاعر عيد بن مربح

لـ تركي الشدادي، ، في غير مُحدد، آخر تحديث

مساجله مع الشاعر عيد بن مربح - تركي الشدادي

اقول في قصيدتي
...............

ياراكب اللي فوقها الخرج منشور
يزهاه من شغل العذارى فنونه

تشدي ظليم ٍ مرتعه نايف القور
متذير ٍ قناصته يخبرنه

تجفل ليا أوحت فوقها يصرخ الكور
وإن حسها الراكب تفرج حزونه

من سيف جده سجها طلعة النور
واحفظ جوابي لين تلفي ربونه

ملفاك من يروي شباء كل مشذور
يوم الملاقا لابته يشكرونه

تلقاه في بيت ٍ على العز معمور
على الكرم والجود شيد ركونه

الشاعر اللي هاجسه يغرق بحور
بنات فكره لانطق ماتخونه

تنقاد له جزل المعاني على الفور
كن الجواهر في حشاه مخزونه

كنه على خيرة قوافيه مأمور
بالشعر ياما يطربني لحونه

نخيت قرم ٍ بالمواجيب مذكور
رايه نبي عبر الصحف ينشرونه

أشكي لابن مربح خلف كل منعور
الحال عقب الزين قفت ظعونه

ياعيد قلبي من هوى البيض مسمور
والدمع مثل الغيث لاأرهت مزونه

حالي بعد فرقى الغضي قايد الحور
حالة غريق ٍ يلعب الموج دونه

عليه جرحي داخل القلب محفور
ماله علاج وشفت من المهونه

جرح ٍ علاجه حار به كل دكتور
عجزوا دكاترت الهوى ياجدونه

قالوا علامك قلت يالربع مسحور
في حب من ياعزوتي تجهلونه

راعي جبين ٍ في دجى الليل له نور
تنكب كياني نظرة ٍ من عيونه

رمشه ليا أغضى به على الخد مسطور
يتل به قلبي وتكثر شطونه

ونهده كما التفاح بالصدر مزبور
مثل البرد بين الشفايف سنونه

أبو جديل ٍ كنه الليل منثور
ياعود موز ٍ ناعمات ٍغصونه

كانت ليالينا معه كلها بدور
واليوم مافيها قمر يذكرونه

اربع سنين وفوقها عدة شهور
نسبح بلذات الغرام وجنونه

حب ٍ على وضحى النقاء فوووووق مشهور
على شرف وعن الرذيله نصونه

أيام كانت لي معه ورد وزهور
قبل العواذل حبنا يعرفونه

واليوم وقفوا دونها أعداي طابور
لا..أنفك باب لوصلنا يغلقونه

من عقب ماكانت لناأفراح وسرور
عجزوا مراسيل الهوى ياصلونه

أقفى هوى بالي على البعد مجبور
عن وصلنا أشرار الملا يمنعونه

بعد بنت في قلبي أبراج وقصور
ناوين أهلها مابنت يهدمونه

طاعوا بنا نقالة الحكي والزور
ناس ٍ هدفهم شملنا ينكبونه

أضحك وأنا قلبي من الغيض مفجور
وأجحد صوابي وأتحمل طعونه

وأقول خلوا كل ماصار مستور
قولوا لها إني بخير ياللي تجونه

ماأبيه يتكدر ولو عشت مقهور
عن حالتي تكفون لاتخبرونه

قلب ٍ عجز في حبها يسمع الشور
ماطاع فيها كل من يعذلونه

أمسى كما قصر ٍ من الناس مهجور
العنكبوت معشعش ٍ في ركونه

خافوا به الله يااهل الظلم والجور
لو هم يهود أظنهم يرحمونه

............
رد استاذي ابو غريب بهذه القصيده

............
............

ياركب اللي فوقه الخرج منشور
يزهاه من شغل العذارى فنونه

اشعل شناح يديه ماتلمس الزور
فج العضود موسعات ٍمتونه

والفخذ قطماء والاذن رأس كافور
وعينه تقل جمر ٍ هله ينفخونه

ناب الفقار وذيله أشقر ومحشور
مايميزونه غير من يقربونه

والبطن كنه من شواياه ممخور
دايم مهجنة الهجن يدرجونه

وحبل بطانه تسعة أشبار مشبور
مقوس ٍ يعجبك شكله ولونه

يسرح من الخفجي زبد صدره يفور
يشدا غزال ٍ بالسلق يطردونه

عليه عبسي ٍ محنك وممرور
والدرب مايحتاج من يوصفونه

زهيبه بر ٍ مطحن ومصرور
ودهن وتمر من الفصم ينظفونه

والماء بشنه والعصاء عود باكور
وكلاش فيه المحرقات مخزونه

وصبح أربع ٍ مقف ٍ مع الخبت بحدور
قدمه بجده لابة ٍ يحترونه

عند أبن شداد انسف الخرج مشكور
وسلم على خشمه بلطف وليونه

مد الجواب وقله الوضع مقدور
من ظن فينا مانخيب ظنونه

مده لقرم ٍ لاتكبر ولاغرور
ريف الضيوف اللي عشاهم بيونه

راعي صحون ٍ وسطها يصبح السور
يضحون تالي زادهم في صحونه

تركي ليامنه هبا كل مثبور
عز القصير وعز من يزهمونه

من لابة ٍ وسط الجزيره لهم دور
الطيب في غالي الثمن يشترونه

حوارث ٍ وافين مافيهم قصور
المجد يأرثهم وهم يأرثونه

اللي مثل شرواه ماعنه مذخور
حق ٍ علي مشاركه في غبونه

مأجور ياريف المساييرمأجور
أبشر بجاهي والسلف والمعونه

ياعاشق ٍ في سكرة الحب مغمور
عضيض غلث ٍ وافيات ٍحتونه

يعول كما تعول خلوج ٍ من الخور
شافت ولدها قدمها يسلخونه

وعقب أروحت دمه على دمه تتدور
ماالله هداهم بالرمل يدفنونه

ويقنب قنيب الذيب في راس عنقور
ذيب ٍ عياله بالعوا يشحذونه

عدا وعود باأشهب الملح منزور
لولاه هف مع الشفاء يذبحونه

والحب سهم ٍ يطعن إناث وذكور
وينتج عنه عله بليا سخونه

ومع الغروب يصيب راعيه حاشور
يقراء آية الكرسي وترقص سكونه

لاشك في سلم العرب شبه محظور
راعيه لو إنه بري يتهمونه

يصير في نظراتهم تقل مجدور
ماتقل ذاقوا من مذاقه نمونه

قالوا به العشاق كلمات وسطور
صوارم ٍ حوض الدرك ياردونه

والعرض مثل البنك يحتاج ناطور
ولا يحسبون رجال من يهملونه

حنا بحكم وشرع والكف مقصور
ومن زل سلطات البلد يسجنونه

أصبر وعادي يبرك الحض ويثور
وإن ثار فك القفل لو يقفلونه

وعليك باللي يطلبه كل معسور
ترى الامر بيديه والكون كونه

معك أختصرت الرد من غير مقصور
برأي ٍ عسى أهل المعرفه يسمعونه

............
عيد بن عوض بن مربح الرشيدي

© 2024 - موقع الشعر