قالو غريب وقلت ماهي غريبه - حميد البني

بكل الحب ازف اليك ايها الشهم الكريم
هذه الابيات المتواضعه اتمنى ان تقبلها

وتقبلني محباً
اخوك حميد البني

هلا هلا بالمهلي عد ماهلت
مزون غيمه بأذن الله باريها

اللي يرحب بضيفانه اذا حلت
وبالقصايد اذا حطت يجاريها

جد الجديد وجاد الفكر وانحلت
عُقد قديمه من اول كنت اواريها

وعوانسي من بنات الفكر قدشلت
براقع اول عن العالم تداريها

الوحدوي جا وجاب الجل واتجلت
جل القصايد ولكن من يباريها

حياك ياشهم هامة هامته علت
وشكلت بالسماء لوحه لقاريها

اسمي موضح ولي صوره معه طلت
وخبرتي ملك لي ماني بشاريها

من قوم والله ماهانت ولاذلت
لاهل الوجاهه ولو كثرت مصاريها

تسعى ورى العز ماملت ولا كلت
والعز نفسه معاها في مساريها

سميت نفسك بأسم اللي بها اتحلت
بلده عظيمه وزانت به حواريها

ياصاحبي دلني لا لقاب مادلت
ياوحدوي عاشت الوحده وطاريها

وايامنا القادمه ان كان ماقلت
اكيد بانلتقي بك واللقاء فيها

ونحل واجب اجاباته معي ظلت
والكل يبرز مواهب فيه هاويها

الشعر تعرف اساساته اذا اختلت
يضيع حسن القصيده من معانيها

الشعر سامي لو الالفاظ به خلت
مايعدله صدربيتين او قوافيها

ياعسكري محترم بالله مازلت
بك القريحه وللزله خوافيها

حبيت اوضح محبه بس لك ملت
قلبي وقلبي حمل لك فيه صافيها

ومعرفة ناس امثالك ترى سلت
خاطر محدث معاليكم وراعيها

وصلاة ربي عدد ماقومنا صلت
على النبي سيد الامه وساميها

© 2024 - موقع الشعر