يا هيهِ طيري

لـ فايز القريقري، ، في المجالس والقهوه، آخر تحديث

يا هيهِ طيري - فايز القريقري

ياهيهِ طيري عن دروبي وَنَا غير
,,,,, غير البشر ماحْسبها فوز وْخساره

ماشي طريقي عكس وآخالف السير
,,,, واجلس معَ السّمّار في كلّ حاره

وجدي على سيار متروسةَ القير
,,,, إمّا بجيب ٍ أو ونيت الغماره

واقضي حياتي كلّها فالمشاوير
,,,, سهران ليلي نايم ٍ في نهاره

وآطرير حر ٍ مثلْ مالطّير بيْطير
,,,, وآخذ حلا الدّنيا وِهَذي الشّطاره

ياليت وِانْ حظّي كما سالم الزّير
,,,, اللي تربع فوق عرشالْإماره

فارس وِمِن حولي مهار ٍ طوابير
,,,, وابْهن أَطفّي وسط جوفي حراره

ولاحط لي فالدرب شوك وْمسامير
,,,, والحبّ هالك من تولّع بناره

رامي بنفسه في غياهيب للبير
,,,, جاني على روحه وينْدب قراره

ياهيهِ مجنونه تمسّي على خير
,,,, مسّي على مثلي يواكب حضاره

ماهوب سواتي من على نفسهِ ايْجير
,,,, أرضي هواء نفسي صريح العباره

ماهو بنا ياهيه يبالله الْخير
,,,, بالله على من هو سواتي شعاره

صادقت ذاتي قبْلَ لَاصْدقْ معَ الْغير
,,,, كيفي مزاجي موت وَلّا صداره

والحبّ عندي ليل ما فيهِ تقْصير
,,,, ليل ٍ وازيده لو تبين ابْنهاره

وانتي تبيني قاضيَ الليل تفكير
,,,, والكلّ منّا عايش ٍ وسط داره

ثمّ احْتري لي منك مرْسال تعبير
,,,, مكنون في وسط الضّماير عباره

مضمونها حبّ العذارا مقادير
,,,, في ماضي الأحْباب كلّه طهاره

وآقف على بابك موْلعْ بتصفير
,,,, وارْجي ملاقا بيننا بالإشاره

واحلف بدونك صابهَ الجوّ تعْكير
,,,, والجار ما يرتاح ما شاف جاره

وابْرك على حظّي كما برْكةَ الْعير
,,,, بركة كسيْر امْعصّبين الجباره

لكنّ ياهيهَ الْحَذَر والْمَحَاذير
,,,, من ناس تلْعق من وراهم مراره

© 2024 - موقع الشعر