جرح الضمير - سلطان عتيق الحربي

اكتب حروف الشعر وعيونك الهام
ماني بشاعر لكن اكتب حروفه

احساسي بقلبي يترجم لك انغام
ياعز واغلا من تجيني طيوفه

ماني بشاعر لكن ابياتي اعلام
دايم على جرح الضمير معسوفه

صدق المشاعر تنبني ماهي احلام
ولاخالف افعالي كلامي اعوفه

اقول قول الحق واسري بالاقدام
ولاهمني كلمة عذول معروفه

الحب في دروبه مشينا من اعوام
وفي قلبي المجروح تطعن سيوفه

ياغايب (ن) غيبتك طالت ولا نام
طولت بغيابك ونفسي شغوفه

الى متى ببقى على حال الاوهام
ودي بحضنك صدق لوهي كلوفه

لو صار بعد الحضن موتي بالاعدام
العمر عشته وسط حضنك اشوفه

ترى الهوى حلوه قليل (ن) ولا دام
ولو دام حلوه عاجلتنا الكسوفه

ياقلبي المجروح جرحك من العام
باقي على حاله وهمي يلوفه

صاحبك عن حبك ترى خاطره شام
معقول عن شوفي ترده ظروفه

البعد اضناني وزايد بالاسقام
الشوق مثل البرد والوصل صوفه

© 2023 - موقع الشعر