في حفل الشاعر متعب العالي - رائد العالي

الشعر مطلب في كثير المواقيف
رمز الأصاله والوفا والبطوله

له هيبته عند الرجال العواريف
ولا قليل العرف ماهو بحوله

كم شاعر بيوته كما ضربة السيف
آثارها ماتنمحي بالسهوله

والشعر مقصودٍ كثير التكاليف
ماكل من يبغى ينوله ينوله

الله يجملني مع اهل المعاريف
ويسرهم شعرٍ لساني يقوله

في حفل متعب مكرم الجار والضيف
ذخر الاصيل اللي تشرف فعوله

يامرحبا ترحييب حشمه وتشريف
عد السحاب اللي تناشت ثعوله

على الشحم والطيب والعود والكيف
وعلم يسر اهل الكرم والرجوله

ليلة شرف تسوى سنينٍ مراديف
وشوف النشاما مكسب اللي سعوا له

على الشرف مازعزعتنا العواصيف
ميقافنا ثابت ولا به ميوله

متعب عشانك مانحسب التكاليف
لجلك صعيبات الامور محلوله

مبروك ياحرٍ عليت المشاريف
تستاهل النوماس في كل جوله

الله يجيرك من سهوم الصواديف
وتنول كل اللي تمنى تنوله

وحنى ذوي عالي سيوفٍ مراهيف
من عزوة الهيلا ونعم الحموله

تاريخنا ماهو بحاجه لتوصيف
كل الرجال الطيبين شهدو له

للمعتدي عله ولضيوفنا ريف
ولا نلتفت لاهل العقول الجهوله

© 2024 - موقع الشعر