ميزانُ العدالهً ..

لـ مقبل البلوي، ، في غير مُحدد، آخر تحديث

ميزانُ العدالهً .. - مقبل البلوي

عطني من اللي تقعد الراس فنجال
فنجال دله يقصر النقد عنها

حتى اتهيض واتمثل بالامثال
واحط برقاب الصعايب رسنها

سرا بي الهاجس على كل موال
هذي يبينها وهذي دفنها

خذها على كف القدر فال وعقال
من واقع افراح الحياة وحزنها

قتال يا هم الرجاجيل قتال
يوم اقبلت خيلك تسابق زمنها

اوهام واحلام وطموحات وآمال
ندفع على وجه البسيطه ثمنها

من كثر ما ندور على راحة البال
ما عاد ندري وين يمة وطنها

صرنا نقدس عظمة الجاه والمال
ونضيع فروض الصلاة وسننها

والخاتمه يوم نتغطرس ونختال
ارقابنا تنساق للي رهنها

هذا الكلام اللي من الواجب يقال
عنه الغرور اعمى القلوب وفتنها

كان الطمع له قلب الانسان ميال
نرمي على وجه القناعه كفنها

نور الصباح يبدد الليل لو طال
ويشرق على شام البلاد ويمنها

ياللي تهمك معرفة بعض الاحوال
جتك المصادر واعرف العلم منها

الكوكب اللي منقطع عنه الارسال
بينه وبين الارض واللي سكنها

حطت عليه رحالها اقدام رجال
رحلة ذهاب وعودته ما ضمنها

بعيد عن حب المظاهر والاشكال
قريب من بوح النفوس وشجنها

وان كبرت براسه تبي تصغر جبال
وفي كف ميزان العداله وزنها

© 2024 - موقع الشعر