عيّد المحبوب

لـ حسين خميس آل علي، ، في غير مُحدد، آخر تحديث

عيّد المحبوب - حسين خميس آل علي

عيّد المحبوب بين أهله سعيد
يضحك وفرحان مشروح الصدر

وإلاّ أنا عيّدت بهمومي وحيد
الحزن ويّاي دايم والكدر

يوم خلّي راح وتباعد بعيد
عنّي ولا عاد صوبي بالنظر

صحت بأعلى الصوت لكن مايفيد
والمجفّي ما بيرجع بالزقر

صاحبي مفرود بالحسن الفريد
ما وجد شرواه أبداً في البشر

سيّدي يأمر وياخذ ما يريد
منّي ولا آروم أعصي له أمر

لكن المحبوب من طبعه عنيد
دايمٍ يزعل وأبادر بالعذر

كل يوم الشوق في قلبي يزيد
يا حبيبي وانت ما عندك خبر

خلّنا يازين نبدأ من جديد
قد كفاني منك صدّك والهجر

انته تدري بإن حبي لك أكيد
مخلصٍ ويّاك في طول العمر

حبّك الطاهر جرى لي في الوريد
عمّ كل الجسم حبّك وانتشر

في المساء والصبح زولك ما يحيد
عن عيوني ودوم أختالك تمر

بس يالمحبوب يكفي لا تزيد
الهجر والحال منّي منسفر

أنظم الأشعار لأجلك والقصيد
وأبدع الأمثال وآصيغ الشعر

والختم يالخل خلنا نستعيد
الوداد وياك يكفي (م) الصبر

© 2024 - موقع الشعر