همهمات النور

إلى كل من سمع طيفي .. يناجي همهمات النور
و يروي قصة الأحباب على أعتاب حرماني

وينثر من بقايا الوجد .. عطورٍ طيبها منثور
و يرمي من حلى ذاته مرايا حسن رحماني

يكلمني و انا أسمع حكايا العاشق المغرور
ويحكي و يا حلو حكيه عجيبه.. كيف حاكاني

أحس انّ الفرح ماليه و لكن قلبه المبتور
حكا القصه بعلقمها وحكاها القاصي والداني

يقل له: شفتها مره .. دانه .. في صحن بلور
بلا إدراك انا مني لقيت احساسي ناداني

يناشد هذي الريمه ويطلب طرفها المسحور
و ذاب بناعس النظره يومه طرفها اغواني

حسنها شي أذهلني ملامح من حنايا الحور
و ربي.. أحمده .. ربي إذا من قربها اعطاني

عجيبه !! كيف هالدنيا ؟؟ تغير حالنا بالفور
لقيت الدانه اللي لي تنهل من عشق ثاني

تحبينه و انا احبك .. و حبك في الحشا محفور
بلحظة كنتي الأحلام وصرتي منبع اشجاني

تصدني من هواها لين أمسى خاطري مكسور
واردتني نواظرها .. مثل ما حسنها ارداني

عجزت اني أغيرها .. و احطم بيننا هالسور
واصارحها بإحساسي واشاركها بألحاني

قدرنا مختلف يمكن قدر كل(ن) عليه مجبور
و لكن ظلت الدانه !حلم صافي و أغواني

زوايا من مرايا الذات سكنها عشقي المغدور
و باقي ما بقى مني رسمته خادع اوجاني

كتبت اشواقي في دفتر هواها حرفه المسطور
و توجته على عرشي بقايا طيش صبياني