الشيب جاير - جابر بن حوبان

العين عندي ترى يا صاح هماله
من شوف عود شكى من صدة عياله

يشكي على من ?? عياله والدمع يذرف
من البكا و الحزن ذا ناحل حاله

يقول ما عاد فيهم من لفى يمي
ما فيهم اللي صفى لي و الحمل شاله

قفوا و أنا وسط داري و أمسح الدمعه
امسح دموع على الخدين هماله

جالس وحيد و لا به من يحدثني
و من كان مثلي أنا يا بوك عزاله

في صغرهم كم تعبت و ذقت أنا الحسرة
أشقيت نفسي و هذي أخر الحاله

تعبت و ذقت الكدر من شان أنا اسعدهم
و جرعت جور الزمن في عدة أشكاله

و عملت حتى بشغل ما يناسبني
من شان ما يقال هذا جوع أطفاله

و أصبحت رحال من ديرة الى ديرة
متعرض للزمن يا صاح و أهواله

و أبعدت عن ديرتي ثم عشت أنا الغربه
و صبي عيني لذيذ النوم ما ناله

أسهر و أحاتي أطفال رحت أنا منهم
صغار ما يعرفون الوقت و محاله

كم صلفقتني الليالي و اتعبت حالي
منها فقدت الشباب و ضاعت آماله

و اليوم قفى شبابي و قفت ضعونه
و عصر الصبا راح مني وقفت رحاله

طعنت بالسن و جسمي ما يساعدني
و الشيب جاير و فيني وثق حباله

و حتى تجاعيد في وجهي تسابقني
و الجلد سود الليالي غيرت حاله

© 2024 - موقع الشعر