أرخصت عمري - تركي بن حميد

يا راكب(ن) من عندنا نابية شطّ
تشدي ظليم(ن) بالخلا صايعه ذور

وقم الرباع ونابها مابعد نط
تكسرعصّي الكور لو كان ماسور

تشدي لكدريّ القطا حين قرّط
إنصفّ ريشه عقب ماهو بمنشور

فوقه غلام(ن) لا اظلم الليل ماغط
أدلّ من فرق القطا صوب خابور

تلفي بني عمي ورا نجد بهبط
أهل بيوت(ن) كنّها شمّخ القور

أهل صحون(ن) بالمجاعة تقلط
ذباحة(ن) مازاد نيّه من الخور

إن جيتهم ملزوم بالصوت تصعط
وعطهم مكاتيبي قبل تجدع الكور

واخبر بني عمي ترى الشيل بي غط
والنفس ماتصبر على الضيم والجور

عطّوا كما عطّت حصان(ن) الى عط
خطو الأصيل اللي من الزاد مبرور

لعينيك ياللي بالعويدي تمشّط
دقيق رمش العين كنّه من الحور

ليته حضرنا يوم سوّ البلا شط
نار الذليل وردّها كل مسطور

شمالنا من مسّ الارسان تنفطّ
وايماننا تطلق من السوّ مقدور

وارخصت عمري عند جيش المخلّط
ماهمّني ناس(ن) يقولون حاذور

الغوج ردّيته على غير يصفط
على شنق كنّه من القين مكسور

كم فارس(ن) من راس رمحي تفرشط
مدحّ راسه حط فالحزم جافور

عليه خفرات(ن) بالاسلاب تشعط
خلّي عشا لمرهفل الذيب وطيور

© 2024 - موقع الشعر