ينبوع الصخا

سرنا لينبوع الصخا مكرم الجار
اللي سعى لرعيته بالصلاحي

نقّاض مايفتل حيول(ن) ومكار
يصمت ولو هو يسمع العلم صاحي

جبنا له اللي كنّها ظبي الاقفار
مركوب من يروي شباة السلاحي

لافين عنّه عند ما قلّط النار
ولاني على اللي ينتوي له شحاحي

واقبل لنا بالعلم واقفى الدويدار
وجانا من الفندي جواب(ن) قراحي

قالوا جواب(ن) لاحكي به ولا صار
الله يعين اهل العقول الصحاحي

جانا بعذر وقلت انا الربّ ستار
رزقي على مذري هبوب الرياحي

الرزق ياتي مثل هتاش الامطار
ماله مصك ولاش دونه سلاحي

ان كان تسمع من هل الكذب والعار
ودّع بنا رازق خفوق الجناحي

وعدنا على هجن(ن) من البعد ضمّار
من القفل يشدنّ النعام المداحي

تودع حصا الرشراش بالدوّ طيّار
الاّ ونقدع روسهن باللواحي

خذوا عليهن ساعة(ن) وقم مغوار
وعن الوعر عطوا بهن السماحي

كم ليلة(ن) سرنا على هجن ومهار
نطلب من اللي خزنته ماتباحي

حنّا كما حرّ(ن) مراقبه الاوعار
يشهر الى شاف الجفا عنه راحي

وحنا مسقّية العدو كاس الامرار
ومعشّية بالضيق برق الجناحي

ياما نزلنا منزل(ن) غبّ الامطار
السبر ينطش والجهامة ضواحي

كم ذود مصلاح(ن) على راع الاقفار
ناخذ قلايعهن بروس الرماحي

والطرش جاك مشوح(ن) عقب ماذار
هجّ الحلال وغثبروا بالصياحي

يا ما حديناهم على الميسم الحار
هدّات حرّ(ن) تعجب اللي يناحي

وجاني جواد(ن) مارج(ن) زنيه وسار
بايمان ربع(ن) يبعدون المناحي

كان الخطا منكم تقبّلنا الاعذار
وان كان منّا طالبين السماحي

ما ابيع ديني بالدراهم والافجار
المال يذهب وأخر العمر ماحي