وا ويل حالي صرت أهوجس لحالي - تركي التركي

يمه ذبحني حب بنتٍ لها زوج
فيها الجمال اللي تعدى الخيالي

يمه جميله ما درج خدها روج
ماشفتها لكنها وسط بالي

دين وحشيمه ما يجي منها عوج
ولاهي من اللي دربها بالخمالي

عرفتها في وقتها كنت مزعوج
جتني تذكرني عظيم الجلالي

حبيتها حبٍ دخلته بلا خروج
وأدري بحبه لي وهي راس مالي

ماهيب بنت زنوج تطلع ولا علوج
ولا من اللي زايده بالدلالي

جاه النصيب ابلا تحاسيب وهروج
نصيبها هو صار مبلي وبالي

أقفت وأنا وسط البحر أدحم الموج
وا ويل حالي صرت أهوجس لحالي

ذي حكمة الخلاق وأعيش مسهوج
مادامها دنيا وش اللي جرالي

جتني رساله ناقله راعي الدوج
قالت تكلم وش جواب السؤالي

شرحت لك قصة حياتي وأنا أروج
زوجي طلع مدمن ولاهو مثالي

أسكت أنا واصبحت بالهم ممزوج
محد ٍ نظرها لا عمام وخوالي

العلم لله ربنا مالنا حوج
هو مرسل الأمطار والجو خالي

يالله أنا طالبك ياناصر الفوج
ترحم عزيز ٍ حاله اليوم مالي

© 2024 - موقع الشعر