البارحه

البارحة ما لاج في عيني النوم
سهران طويل الليل والجرح دامي

متوسدن مركاي والقلب مهموم
وهمومي القشرا أبت لا تنامي

يطري علي مليون طاري ولا قوم
أفل ذكرايه وراجع كلامي

بكيت من جرح به الصدر مكتوم
جرحن لفاني مثل ضرب السهامي

جرحن قديم بخافقي ما هو اليوم
له سبعة أسنين وفا بالتمامي

همن ملازمني وأنا صرت ملزوم
أرافق أحزاني واشد الحزامي

بسباب من هو صوب القلب بسهوم
حتى نحل جسمي ونشف أعظامي

يا ليت يلفيني خبر عنه وعلوم
مشتاق لعلومه وأنا حيل ضامي

غاب الحبّيب وما لفا منه مرسوم
ولا لقيت اللي يوصل سلامي

عشنا بدنيا مالها وقت معلوم
دنيا غدت في عين فايز ظلامي

دنيا توردنا على عد مسموم
ونشرب مرارتها وحنا صيامي

مادام راح العمر والرزق مقسوم
راضي بحكم الله رفيع المقامي