"البارحه ياروح روحي" جفن عيني ماغفى
يسهر مع نجوم السماء والنوم عيا لايجيه
يسهر على شانك ولاحصل مواري للوفا
ماجاه منك الا الجفا والصد فالوقت الكريه
ياروح روحي من هو الي دلك دروب الجفا
قلي ترى قلبي بعد فرقاك همه محتويه
الهم خيم وسط قلبي كنه جبال الشفا
والقلب ضاق من الهموم الي بها فكري يتيه
والجسم مل من السهر والليل ماوسطه دفا
الليل طالت روحته والصبح باقي نحتريه
والدمع جمع جيشه الطاغي عليه ثم لفا
واستيسر عيوني غصيبه والجفن عجزان فيه
والجرح ينزف من وسط صدري ولاحوله شفا
وين الشفا مادام مثلك صار وصله نرتجيه
والضحك عني من بعد فرقاك روح واختفى
وانا وحلمي مثل من يطرب سراب ولالقيه
والحظ عودن لانصيته صار معطيني قفا
عودن عمى مكسورتن ساقه ومكسوره يديه
والحال من يوم ماقفيت وفراقك ضفا
بالظبط كني من فقد في وقت واحد والديه
والجو عندي من بعد فرقاك ماعمره صفا
وشلون يصفى وانت هجري في حياتي مشتريه
لاكن انا بنشدك دام النور قدامي طفا
وشلون تهجر من هواك وصار وده تهتويه
وابنشدك دام الزمان ان راح مافيه حسفا
عن قلبك الي مايبي مثلي وعشقي مايبيه
وراه قلبك ياحياتي صار اشد من الصفا
مثل الذي لو مات ابو اظن مايبكي عليه
العام كنا مع بعض ماهمنا هرج الخفا
واليوم حالت بيننا الايام بلي تشتهيه
اليوم قلبي والهموم امسوا رفاقه وحلفا
ليتك تجي وتشوف قلبي كيف همي مبتليه
ليتك تحس بقلبي الي لو زعل منك عفا
ماهمته سود الليالي لو أهي عنك تحديه
واخر كلامي دام قلبك للهواء مره نفا
اسمع كلامن من لساني مابقى مثله شبيه
ان كان تبغاني ترى مثلي بحظرتك احتفى
ماهمني شين مضى والي مضى وعد انتسيه
وان كان مره ماتبيني قلت يانفسي كفى
باب الهواء والحب توبي عنه لاعد تطرقيه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين