صبحي بطلّتك .!! - ناصر الرياحي

للصبح نور ونور صبحي بطلتك
يالفاتن اللي طلتك كنها النور

من ملبسك لا بسمتك لا فخامتك
الا بقول انك يا خلّي من الحور

لبى الخصل لا حولت فوق جبهتك
ولبى جديل فوق الامتان منثور

ولباه رمشٍ فاتك بالملا فتك
كم عاشقٍ مركي على كبده الجور

ولبى ثمان لامعه خلف شفتك
سوات لمع البرق في ليل ديجور

ولبى ولبى يالغضي مز توتتك
من مز توتك ياخذ شوي مخمور

وغمازتك اليا بدت ف إبتسامتك
لاتنزعج لا ضعت منّه على الفور

لاتنزعج اذا التفاصيل غرتك
واصبحت في عيون المخاليق مغرور

عادي اذا فخامتك يوم نصتك
ملك جمال بجد ماهوب بالزور

ابيات شعري كلها تحت إمرتك
امر عليها ياعسى مانت مامور

شاعرك يبغى يحتفي في سعادتك
خلك يغرد بك تفاصيل وشعور

لكن تأكد نور صبحه بطلتك
يالفاتن اللي طلتك كنها النور

© 2024 - موقع الشعر