جيت اعترفت

وسط صدري عذاب وفي عذابي عذاب
وفي عذابي مصاب ومن مصابي ضَعَفت

ذاب منّي صبر لو ضاع منّي خطاب
بالنهاية أنا ماضعت ؛ جيت اعتَرَفت

الخطا وارد ، خصوصا ً لين عمرك شباب
والخطا لو بدونه بالحيا ما احترفت

رغبتك في الحقيقة مثل شكل السراب
لا تعنّيت ليها وانتهيت ؛ انصرفت

الخطا ما خلا من ناس ماهم خراب
واعترافي بذنبي يوم دمعي ذَرَفت

اعترافي فضيلة ولْ حِصَل جرْح طاب
اعترفت بحقيقة من بعد كيف خُفْت

ما أهاب البشر بس صوب ربّي أهاب
ولا ملا الخوف قلبي في دعاءه وَقَفت

وقفة انسان عبد ٍ خاف ربّه و تاب
من طريق ٍ سيوله شين وآنه انجَرَفت

لكن الله رحمني لين هالدرب خاب
وأحمد الله يوم انّ الحقيقة عَرَفت