الكرامه ما تعوضها مره ..

لـ عبدالعزيز المشعل، ، في غير مُحدد، آخر تحديث

الكرامه ما تعوضها مره .. - عبدالعزيز المشعل

استمع يا صاحبي للعارفين
إن حداك الوقت بكره تذكره

لو سهرت الليل بالقلب الحزين
وش كسبت ب ليلك الي تسهره

لا تشيل الهم وحساب السنين
الحوادث والصروف مقدره

استعن بالحي سبحانه يعين
واصبر اصبر واحمد الله واشكره

ما جزع بالوقت قلب(ن) فيه دين
وما يفجّر عبرته غير المره

لا تبيّح سدك وعلمك ثمين
ان لقيت الي يسد ولاّ اقبره

خلك اقوى فالصعايب لا تلين
لو يطول الضيق بالعزم ابتره

والرفيق الي يقول انه عوين
ان تجمل بالوفا ولا احقره

العطا يثمر بروض الطيبين
ماحلا طلعه ويا زين ثمره

والردي ما بيّن بعينه سمين
ما عطيته بظرف ساعه ينكره

و المظاهر ما تزيّن لو تزين
الرجل ياصاحبي في مخبره

ولا تذيكا من غبا معَ الفطين
ولا تجابه واحدٍ ما تقدره

العقل زينة على الشخص الرزين
والحماقه راس مال المسخره

لا تهين النفس في درب الحنين
الكرامه ما تعوضها مره

ولا تشيل الهم وحساب السنين
الحوادث والصروف مقدره

ارضي الله واطلبه وحالك يزين
ولا تضايق احمد الله واشكره

© 2024 - موقع الشعر