رذاذ أحترام !

جيت عقب الغياب اللي يهد المتون
في عيونك مشاريه وعتاب وملام

جيت شايل من كفوف المحبه طعون
منكسر خاطرك وأحلام عمرك حطام

جيت باين على وجهك سواد الجفون
ما بقى لك ف ليل الحب غير الظلام

لا تكابر مدام البرق فج المزون
انكشف ما دفنته في حروف الكلام

لو تخون الملامح ما تخون العيون
بان ف عيونك النعاس جرح الغرام

انت ما جيت إلا يوم صرت امغبون
لا تحاول تغطي موقفك بالسلام

تحسب إن الغلا عقب الجفى ما يهون
كيف وأنته بسكينك نحرت الهيام

صاحبي ما بقى ف الصدر قلبٍ حنون
قسوتك خلّت قصور المحبه هدام

كنت واقف لحالي في وجيه الضنون
لين شفت الغلا ماله مقر اهتمام

طاحت احلام عمري من جفاف الغصون
وطار من شجرة الخلان كل الحمام

عقب ما أنته على كل القصايد تمون
عقب ما كان لك ف القلب قدر ومقام

صار بين المشاعر والمواصل حصون
ما بقى من هواك إلّا رذاذ إحترام