مرقب الصاح - بندر بن سرور

لولاى اعد الرجم في مرقب الصاح
والعب بعسر القاف مانيب صاحي

قم ياعليثه للشهر عد وش راح
باول جماده عد لى ويش راحي

وهات القلم وكتب الى الخط ياشاح
زرف علاه وسجله بالنصاحي

وعيني اللى ماتهنت بالامراح
من يوم جاني بالبخايص مناحي

البارحه مامرحت لين القمر طاح
من شرق لينه يمة الغرب طاحي

ياجعل يسقيهم من الوسم جراح
قدام ينزاعون لى بالنواحي

واقلبي اللى داخل فيه فحفاح
فحفاح قوم محتسين الصباحي

تليتني تلت معاويد فلاح
سواقهنه مايذوق المراحي

فالليل سراي وفالصبح سراح
ودايم عليهنه بشونه يلاحي

يسقٍٍ لهن غرسٍ على العين مرتاح
يعدل عليه لجم في مستراحي

ويامن سميه في سوى الحزم شباح
ياكم فجر من عين حسو قراحي

واسمه يباري الصيد وان جاك سراح
جافل وقافيته هبوب الرياحي

وياشبه عفرا للمداوير مضياح
تجذب هشاهيش الخلا بالضياحي

مرباعها بين النويع والاسياح
ومقياضها عد الرويس الملاحي

© 2024 - موقع الشعر