ياغايبه - سليمان السلمي

ياغايبه ماعاد للصوت قيمه
دام الوصل ياغايبه بس بالصوت

غيري يشوفك كل ليله مقيمه
وانا أتمنى شوفتك قبل لاموت

والنيه الي عن غيابك سليمه
مافكها موج البحر من فم الحوت

مني وبارض الغير طحتي ياغيمه
وانا استغيث لشوفتك واقلب الكوت

بخلك معايه يختلف ياكريمه
ماهو بخل في مدت المال والقوت

البخل هجر وغيبة مستديمه
يطلع بها العاشق ولايمكن يفوت

ياللي خذيتي من حياتي نعيمه
واحرقتي الخافق على صد وسكوت

ودي أشوفك وافهمي يافهيمه
إلإ متى والشوق بالصدر مكبوت

سلمتي لك قلبي وحاله سليمه
ومنك استلمت القلب في وسط تابوت

ان طال بعدك فالعواقب وخيمه
يمكن على موت الغلا نطبع كروت

حني علي واستدركي يارحيمه
والصوت ماينفع عقب فايت الفوت

أما تجين وتقلبين الهزيمه
والا يجيني قبل ماشوفك الموت

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر