القلب يعشق طاعنه - سلمان الكناني

ياصاحبي ببْدي لك الي بالحنايا قد خفا
لاصار صدرك مثل صندوق الثمينه ببتّدي

قال ابتدي صدري لقولك بير واضلاعي حفا
لصويحبك.؟ صاحب.. وانا سيفك بوجه المعتّدي

قلت استمع واحذر من المشعال لو انه طفا
لاتأمنه حتى تشوف سيول وادِيك تعّدي

لو لك من اصحابك ميه..., من بينهم واحد صفا
ارفع يدينك واحمد الي له عباد توحّدي

القلب يعشق طاعنه..., والغدْر مايعرف وفا
والهم ماتبكي عيونه..,لا لقى عين النّدي

والبرد ماهو برد..., عند الي يحسون بدفا
والنايفه عزم الهزيل...,ان جات من دون الجّدي

والكذب يُحسب جد..., عند الي عن العفه عفا
والصدق يصبح كذب...,في عين المنافق والرّدي

احيان جرحك مانزف دمه.., ويبطي ماشِفا
واحيان مالك جرح...,’ بس دمه بداخلك يعّدي

اليا غفا جرح النهار الليل جرحه ماغفا
ياصاحبي حظي تردى والى انا ماني ردي

انت الوحيد الي من الميه من اصحابي صفا
وانت الوحيد الي لقيته نور ليلٍ سرمدي

© 2024 - موقع الشعر