نظرة زمن

نظرة زمن ..! حانت لمن ..؟ ماكنها ترقب اخطاك ..؟
أقبض يدين .. أصحي لعين .. لا ياخذك عذب المنام

دام النظر .. حظ وحضر .. قلّ له هلا وإن مابغاك
وإن ما لفى ..! عذر الغفى ..! أو صادفه غيرك وقام

ابسألك .. لو كان لك .. يخطيك ..؟ لا عفواً خطاك
وابسألك .. وش يخذلك ..؟ ساعة توافيك الأيام

رح في يقين .. الحظ حين .. يهواك ماياخذ سواك
خلّ الظنون .. اللي تخون .. تكذب ..! ولا غيرك يلام

نبقى بشر .. نتبع أثر .. دايم ورى هذي وتاك
رغبة / أمل / غاية طموح / ضحكة فرح / صدق الأحلام

نفسك تمنيك اللقى ..؟ ماوافقت يومن هواك ..؟
امش الوساع .. أطول وداع .. يحين ..! مافيها كلام

قال: الوعد .. طال وبعد .. قلت:اسمع الكلمة تراك
وقفت وعد .. بواحده .. متباعده ..! وإنت بزحام

رحت لوعد ..! من هي تجي .. ناديتها ..! عافت نداك
خسارةَ الدنيا ..؟ ندى ..! خسارة الداعي ..؟ مقام

خسارتك غير التعب ..؟ ماس وذهب ..! طالع وراك
مريتها .. ماعشتها .. لو كنتها ..؟ عمت بسلام

في دنيتك مليون حظ ..! هي حولك أو يمكن معاك
أبٍ غضي ..؟ فأنت الحظيظ ..! بامك رضي ..؟ ترقى الغمام

صاحب وفي ..؟ عز اليمين ..! أخٍ ندي ..؟ زانت سماك
والعافية تاج الحياة .. والسامية وأغلى وسام

هي كافيه .. والباقيه ..؟ في عدّها يقصر مداك
ياكثرها ..! خيرٍ وخير .. ياحلّمها ..! عامٍ وعام

أما العدم واحد وبس ..! لكن واحدها خذاك ..؟
معنى العدم ..؟ ناتج عدم ..! " رح للوراء وأرجع أمام "

من جملتي معنى يفيد ..؟ أو حكمةٍ صابت رجاك ..؟
تفسيرها .. ماءُُ .. بماء .. عظيم .. والفايد ..؟ عدام

هو طبعنا طبع الجحود .. ماظنتي فينا ملاك
لو أشرقت ..؟ طبنا بنور .. وإن غرّبت ..؟ جار الظلام

ياللأسف خان النظر .. من ظن في العتمى هلاك
من هابه الليل ونسى .. قصة مسى لأول غرام

منها تعلّمت الأمل .. درسٍ لنا .. ولذا وذاك
فيها مدى .. فيها حياة .. صارت لنا نبع الإلهام

حين التقى نور وقمر .. حسّنه زهى .. لهنا وهناك
لولا الأمل بأصلٍ يدوم .. هذا الحِسن ماكان دام

قناعتي .. أو نظرتي .. ماقلتها لو كنت شاك
فيني تجاريب السنين ..؟ مامرت مرور الكرام

غنيتها \ عنيتها \ ماقلت ياقلبي كفاك
جاريتها \ داريتها \ ماعاش باليأس الأقدام

وجروحها ..؟ داويتها ..! ماتدري ادواها بداك ..؟
إيمان ..! والخيره بجاي .. وبسمتك لجل التمام

لاتبكي الفايت ترى .. مافات راح ولا بكاك
إنسى ..! ولك ذكرٍ عظيم .. بالصبر في كتاب العظام