نظرة وداع - انتظار العتيبي

احس كني فاقده كل ذاتي
مدري وش اللي بعدها يحتريني

من غاب اللي حضوره غناتي
وأنا ادري أن اقصى المواجع تبيني

حاولت ألملم بالقصايد شتاتي
أثر القصايد همها..محتويني

وشلون أبهرب من بعض ذكرياتي
دامه جميع الذكريات وحنيني

من قبل ما ألبس برقعي أو عباتي
وغلاه لابس نبضة القلب فيني

كنت أفتخر قدام كل البناتي
وأقول هذا اللي أبيه..ويبيني

وكان الغرور بداخلي من صفاتي
وكان الجنون بدنيته يعتريني

واليوم والله راس مالي سكاتي
نظرة وداع ساكنه وسط عيني

أعيش فيها مابقى من حياتي
ماهمني من ذنبها وش يجيني

لابد ما يوم يجي به وياتي
ويشوف بعيونه سوايا سنيني

© 2024 - موقع الشعر