قبل ما ألبس برقعي - انتظار العتيبي

أحس كني فاقده كل ذاتي
مدري وش اللي بعدها يحتريني

من يوم غاب اللي حضوره غناتي
وانا ادري ان اقصى المواجع تبيني

حاولت الملم بالقصايد شتاتي
أثر القصايد همها محتويني

وشلون أبا أهرب من بعض ذكرياتي
دامه جميع الذكريات وحنيني

من قبل ما البس برقعي أو عباتي
وغلاه لابس نبضة القلب فيني

كنت أفتخر قدام كل البناتي
وأقول:هذا اللي أبيه ويبيني

وكان الغرور بداخلي من صفاتي
وكان الجنون بدنيته يعتريني

واليوم والله راس مالي سكاتي
ونظرة وداع ساكنة وسط عيني

أعيش فيها مابقى من حياتي
ماهمني من بعدها وش يجيني

لا بد مايوم يجيبه وياتي
ويشوف بعيونه سوايا سنيني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر