أهلا هلابك

لـ شاعرة وطن، ، في غير مُحدد

أهلا هلابك - شاعرة وطن

يافرحة الشعب السعودي كبيره
شفناك طيب في وكالات الاخبار

بثته (واس )بكل دوله وديره
خبر يسر القلب ويجلى الابصار

خادم بيوت الله يبشر بخيره
والله مايخزي مكرم الضيف والجار

الله يجيره أبو متعب يجيره
والله يحفظه من صواديف الأقدار

قلوبنابالحب هي لك أسيره
وأرواحناتفداك يالوالد البار

أبو كبير الشعب وابو صغيره
وابو اليتامى ومن تجرع الامرار

وابوالارامل والقلوب الكسيره
وابوالفقير اللي عليه الزمن جار

وابوشعوب وناس امست ضريره
وصلت دعاويهم على وقت الاسحار

يامرحبابك عداهل الجزيره
وعد النجوم وعد همال الامطار

أهلا هلابك يابومتعب كثيره
يقولها شعبك من كبار وصغار

هذا ملكنا فاض للشعب خيره
واليوم شعبه في مجازاه محتار

ياجنود متعب جهزوا له مسيره
وياجيش خالد جهزوا طلقة النار

خلو طلام الليل شمس الظهيره
مع لبسة العرضه ومع دقة الطار

وخلو الفرح يعم في كل ديره
نفرش طريقه ورد وننحر له إبكار

ياجعل يوم يعود ..يعود خيره
ويعطيه ربي من كرامات الأخيار

أبو يمينِ الجود وأبيض سريره
يالله عساك بخير وطابت الاسفار

أنشهد إن جيتك لحطة بشيره
حدث مهم وتنقله كل الأقمار

تباشروا ياهل الوجيه السفيره
يادار آل سعود وافين الاشبار

تباشروا باللي يفك العسيره
ياشعب أبوا متعب وشيلو له اشعار

وقولوا هلا ياهل السيوف الشطيره
مع رفعة الرايات إجلال وإكبار

ياسيدي هانت وجتك اليسيره
الله كريم ويعطي الخير مدرار

مثلك ترى ربي دايم نصيره
يعطي على النيه وعالم بالأسرار

وصلاة ربي عد ماقيل سيره
على النبي محمد وصحبه الأبرار

© 2024 - موقع الشعر