يابوي

يهل الدمع من عيني معاني
ودم القلب يجمعها قصيده

واجر الصوت باللّونه وأعاني
واذا عوّد عليّ الصوت أعيده

على اللي يوم انا طفله رعاني
وعشت العمر في عينه سعيده

ياليت الموت يابويه خذاني
قبل ماشوف يومك واستعيده

جاني خبر موتك وهمي طواني
والدار عن دارك يابويه بعيده

اظلم علي الكون واظلم مكاني
وحسيت قلبي انخلع عن وريده

يابوي عقبك الحزن هو كساني
وما شفت في دنياي لحظه سعيده

مرحوم ياوجه السعد والاماني
قلبك كبير ومحتوي من يريده

زبون ربعه كل قاصي وداني
يده كريمه مارضت بالزهيده

يعطي حقوق الله بكل المعاني
حكيم الراي واقواله سديده

ياجعل ابوي بجنة الخلد جاني
يعطيه ربي وكل خيرٍ يزيده