حسبي على الفرقا وكف التواديع

لـ عبدالعزيز المشعل، ، في غير مُحدد، آخر تحديث

حسبي على الفرقا وكف التواديع - عبدالعزيز المشعل

حسبي على الفرقا وكف التواديع
خلت قوي القلب حاله كسيري

يبكي على فقد القلوب المناصيع
الي غلاهم بالحشا مستنيري

الصورة الذكرى .. تزيد المواجيع
لا شفتها.. فيض المدامع تحيري

اكنّها بين الضلوع الملاويع
لو انها تشتب .. مثل السعيري

اصفرت الريضان .. عقب المرابيع
واستاحش الخفّاق .. عقب المسيري

الله على الدنيا .. تفل المجاميع
دايم بها عمر الوناسه قصيري

لو انها تمشي على الكيف وتطيع 
ما كان قاسيت العنا يا عشيري

لكنها جمعه .. ودمعه .. وتوديع
واللي كتبه  الله  علينا  يصيري

يبو فهد .. ياشوق بيض المفاريع
يالي على شم المراجل تغيري

لي حكمةٍ لو طاول السوم ما بيع
وان بيعت الذيدان مرخص بعيري

خذها مقولة صدق .. ماهي تصانيع
لا حان وقت الجد لا تشوف غيري

سيفن يلبي حاميات المفازيع
يعجبك في ضيق النهار العسيري

ارحب يبن عمي قرابت مواليع
مايلعب الداسوس عند الكبيري

لا صلّعت تعرف عيال المنافيع
إليا تخلى فالشدايد كثيري

قدامنا دربن طويل ومشاريع
يالله عسا عسر الليالي يسيري

كلن بعد وصله تحده مواديع
لو انها مثل الحسام الشطيري

الي رحل والي مع الوقت بيضيع
وما مات منهو دافنه في ضميري

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر