هذي الحياة

يا صاحبي صبرك على الحظ لا ضام
واصبر على ضيق الليال ونكدها

لا تكترث للهم لو الفرح صام
واللي يدوّر للسعاده وجدها

واللي تكدر من صواديف الأيام
حظه تعثر والسعاده فقدها

وخلك من اللي هرجهم دوم لوّام
واحذر من غيومً تصافق رعدها

وخلك من اللي تفقدوا فيك الآثام
لا تنزعج لو هي تزايد عددها

اللي نقده أقوام يعجب له أقوام
وعيش الحياة بضيقها مع رغدها

ولا تنزعج لو النكد بالصدر دام
ما ضاق رجآل همومه جحدها

ما يذبح الرجال لا كثر الآلام
ولا كلام اهل الهزال وحسدها

ولا تكترث لو تنرفض كل الأعوام
من ناس تعرف قل أدبها بمهدها

وإذا سعيت لمجدك وجاك هدام
قله يا شين اللي تهذري وحدها

مالك وماله وامش في الدرب قدام
هذي حثالة قوم هذا شهدها

وإذا لمحت الهم في مهجتك حام
بقول لك بيتً بيمحي مددها

إن طولت بلواك يا صاحبي نام
نومة هنا يا حظ منهو رقدها

وإن كنت صوب الجنة تسوق الأقدام
هذي دروب الخير ... هذا بلدها

وإن لك رصيدً يرضي به رب الأعلام
زدها يا باغي الخير زردها وزدها