صورتك الجديدة

صورتك الجميلة
اللي كانت في قلبي زمان
صبحت قديمة وإنشرخت
ومعدش ليها في قلبي مكان
مش كره مني لكن عشان
صورتك الجديدة أجمل
ودا مش مجرد كلام
إن كنتِ مش مصدقه اسألي
وإن كنتِ خايفة تسألي
تعالي شوفي نفسك
في أرض الميدان
ما أرض الميدان ليكِ
أجمل مرايا
شوفي نفسك فيها إنتِ
ومليون حكاية
حكاية الجميلة سالي
والشهيد مصطفى الصاوي
اللي ضحوا لجل اسمك
يعلا فوق كل العلالي
حكاية الشهيد بسيوني
اللي بصرخ جوا قبرة
وبعلوا صوته بقول لأهلة
ما تزعلوش لا تزعلوني
حكاية الشهيد بكير
إللي عليكِ كان بيغير
وكاتب فوق لوحة قبرة
أول يوم في عمري
أحس إني بقيت كبير
وحكاية الشهيد محروس
اللي كان م الفساد مدهوس
نايم فرحان في قبرة
وفي الجنة أكيد مكتوبلة
يختار م الحور أجمل عروس
وحكاية أحمد إيهاب
اللي عمرة ما حد هاب
قال أموت لجل أرضك
تعيش حر يا أم الدنيا
من غير ما ينهش فيها كلاب
والشهيد كريم بنونه
اللي قال أفوت أهلي
وبنت حلوة وصغنونه
لجل أقضي ع اللي كانوا
بينهبوكي وينهبونه
ولا سيف الله مصطفي
قال أموت ما أنا مستفيد
بتحرير ترابك م الغيلان
وكمان أروح الجنة بإيد
في يوم تسلم على المصطفى
ومحمد عماد حسين
قال هموت وأنا مش حزين
لأن روحي مش كتير
على أرض الناس الطيبين
وفي النهاية أنا برضوا عارف
سكني ياما هيبقي فين
وإبن عبد المنعم حسين
اللي صلا في الحُسين
وإللي شالوا الملايين
وإبتسامته فوق خدوده
قال أموت وأسد دين
ولا حسين ابن عمنا طه
اللي الثورة في يوم ندهته
قال والله راح أمش وراها
وعمره ما غير يوم سكته
ولما استشهد قال بالعربي
افرح اضحك ياللا يا طه
جاني رساله يا أبويا في قبري
مكتوب فيها حرارنها
ولا حكاية الشاب مؤمن
اللي كان بالثورة مؤمن
اللي مات وهو مؤمن
واللي بنسمع أبوه بيصرخ
كل ثانية إرجع ياااامؤمن
شفتي إن أنا كان عندي حق
وإن صورتك الجديدة
ألف مرة أجمل وأرق
وإن مرايتك في الميدان
بتشوفي فيها صورة الحق
والمرايا لو مش كفاية
هي وميت أو ألف حكاية
ممكن أديلك على ملايين
يكونوا ليكِ خير دليل
بكل بساطه يا أرض النيل
عليكِ وعلى
شباب التحرير
شعر : وليد الوصيف
Elwasef2007@yahoo.com