شوارد الافكار - عبداللطيف العوفي

شوارد الافكار حدّتني لطرق المستحيل
وانا على طرق الطروق المستحيله مهتوي

الجادل اللي ولعتني وتركت جسمي عليل
حسبي عليها الله وسبحان العزيز المقتوي

البارحه ليلي تمادى كن بعد الليل ليل
كن النهار ابو الفرج في طلته ماينتوي

أصارع الافكار والاحزان في قلبي تهيل
واحس كن احداثها في خافقي تدوي دوي

أنا اشهد إن بالي وانا اعرفه قبل هذا طويل
لكن على وضح النقا ولايحب الملتوي

وانا اشهد إن صبري قوي ويقدر الحمل الثقيل
لكن على الحمل الخفيف من الجفى ماهو قوي

يابنت لو يغريني المعسول والطرف الكحيل
لو ارتفع بالمرتفع واحسب حساب المنزوي

أنا مزاجي صعب واعرف المجمل والجميل
واموت بالظميان واحياناَ ماحب المرتوي

والله مالوم الجوري اللي فيه سحر السلسبيل
والله مالوم البيضتين اللي بذاك المستوي

لاشك انا ماارضى على نفسي بدعوى الحب ميل
أما نتخاوى بالوفا والا بلاش من الخوي

وإن طولت لاتفرحين انا معي للحيل حيل
حتى لو إني كنت ناضج بس ماني مستوي

كان الفياض الممحله ماتربع لياسال سيل
لعلها ماترتوي..لعلها ماترتوي

عبداللطيف العوفي
© 2024 - موقع الشعر