بنت الافكار - ناصر فيحان مشاري

هيضتني بنت الافكار في روس الرجوم
وابتديت انظم القاف واحكر وزنته

ماعليك خلاف ياللي سليت عن الهموم
البلا والله فاللي همومه علته

نامت عيون الخلايق وانا منه محروم
والسهر حكم تربع على الجفن اكته

والطريق اللي رماني على هاك الحزوم
ليت نفسي جنبت مامشت مع سكته

والليالي ماضمنها سوى رب النجوم
خالق الانسان والجان واحصى نعمته

من عصاه يذوق فالاخره نار السموم
ومن يطيعه فاز برضاه وادخل جنته

ياعسى يغفر ذنوب كبر ضلع البقوم
كافل الارزاق ماخاب راجي رحمته

والاجل فاللوح يوم على العبد محتوم
مايدوم الا وجه سامع ادبى نملته

شتت الاوناس وقت صواديفه عقوم
من وقع فيها نشب ماظهر من نشبته

سم حالي واهج حط بفوادي وسوم
تشتوي قلبي طواريه وابطت وجعته

دورة الايام نشرب تجاربها عزوم
كل ماتقسى قسى صبرنا ماهزته

والمعزه عند الاجواد تحفظها السلوم
والوفاء بين الرياجيل بانت حزته

نحتزم باللي عن الخوف والذل محشوم
الشجيع اللي عدوه يوسم وجنته

مرحبا ترحيب برقه توهج فالغيوم
في محل ريح بنه يعطر دلته

عادت الهاجس معاكم طواريقه تحوم
فوق شعر الوادي اللي خيالي نجمته

من يناديكم تجونه قبل حتى يقوم
واسم راعية القصايد قريني شفرته

هب يالمارد تحسب اني اجهل فالعلوم
يالبعير اللي دفناه داخل رملته

نبهتك باسم الله اللي جعل موسى كلوم
حافظ المخلوق من كل شر بقدرته

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر