جنة الغلا - عبداللطيف العوفي

يقولون الغلا جنه وانا اقول الغلا من نار
يدفيك إن عرفت توازنه وان زدت به يحرقك

تفظل واستلم قلب(ن) طعنته وانتبه للثار
فقدتك في مغيبك بس ابا انتظرك على مشرقك

يامشوار السنين المرهقات وبهجة الاسفار
علامك ياعشيق الخير تعطي والجفا يسرقك

تخاف من البحر رغم انك اللي جامع المحَار
صديقك هالبحر ياما عطاك ولانوى يغرقك

حبيبي ماعليك من الكلام وهرجة الثرثار
مادام الليل ليلك والشموس تشع من مفرقك

مادام العطر عطرك يابختري علًم النوار
عن انفاس العطور اللي تهب وريحها يطرقك

وانا اللي لادكرت العنق قلت الله على المشوار
ياضبي الوصف كيف اصطادك بشعري بدون ادرقك

دخيل اللي من مزون الجمال ارهى لك المدرار
وكون بك رعد كل المشاعر والوله يبرقك

ترفق لاتسبب بالهيام وقصرة الاعمار
ترفق قبل لاربك بريق من عسل يشرقك

انا احبك لانك صعب ماللسهل في ديار
وابيك تحبني لاني عن الغير اعشقك وافرقك

علامات التعجب ليش تسبقها بالاستفسار
وانا كلي جواب ليا عكس هادي بحرك ازرقك

اجل كيف الغلا جنه وانا اشوف بغلاك النار
ابا اخفف غلا وادفيك وإن زدت بغلاي احرقك

عبداللطيف العوفي
© 2024 - موقع الشعر