دمعة يتيم

كريم يابرق الدموع اللي على الوجنه يلوح
ماكنه إلا حلم والأيام طفّت شمعته

صرخة يتيمٍ تبعث الأحزان وتزيد الجروح
اليا تذكّر من شكى فرقاه هلّت دمعته

القلب ينزف دم وعيونه من الفرقا تنوح
من عقب ماغاب الحنان اللي تمنى رجعته

في نظرته حرمان واستعطاف للوقت الشحوح
والحزن لو يخفيه تفضح في عيونه لمعته

حتى كلام الناس سبّب جرح لايمكن يروح
كلاً ليا شافه بما يجرح خفوقه ينعته

الواقع اللي عايشه يجبر لسانه مايبوح
وش له يبوح ان كان حتى البوح ضاعت نفعته

مات الأمل في داخله واطفا مصابيح الطموح
إلا طموحٍ يرتجي قربه ويرقب لوعته

انه جوار امه وابوه يصير جسم بدون روح
ويموت لو الموت من جل المصايب وقعته

هذي مشاهد مؤلمه..زادت معالمها وضوح
من شدة الصدمات واولها الفراق وفجعته