هذي جفاتك

لاسالي(ن) قلبي ولانيب مرتاح
والشوق يجرح خاطر الحب فيني

ماغير آخايل بارق الوصل لا لاح
وعيّا يلوح وكل جرح(ن) مكيني

ياخلّي اللي صرت للحزن منّاح
وش فايدة شاعرك لأصبح حزيني

هذي جفاتك ياأريش العين تجتاح
باب الخفوق اللي شكى من سنيني

في غيبتك بسمات الافراح تنزاح
وفي جيّتك يغيب حزن(ن) دفيني

اشوف كفّينك على وصلي شحاح
واقول يمكن تستخير وتجيني

قلبين في جسمين والفرق فضّاح
قلب(ن) يبيك وقلب مايشّتهيني

خبري بك المجروح واصبحت جرّاح
دنيا(ن) على غير إتجاهي تبيني

الله من قلب(ن) بكا بعد الارواح
والله من قسوة خفوقك يعيني

كم لي وانا في بحر الاحباب سبّاح
وكم لي وانا اشيل الخفوق بيميني

احاول اسلى بالسوالف والامزاح
وإلاّ الخفوق الصدق كنّه سجيني

هذا خفوقي حامي(ن) مابعد ساح
مسكين ياقلب(ن) حما من حنيني

كثرت سكاكين الجفاء والجمل طاح
وماعاد بي حيل(ن) على مايجيني

ليتك تجي ابكل مافيك ياصاح
وإلاّ ترى درب الحزن يحتريني

ودي اسلّي باقي عمري بالافراح
باكر تغيب الشمس بينك وبيني

العمر واحد مايردّه إلى راح
كثر التمنّي والحزن والونيني

وإن كان ماودّك بوصلي ياجرّاح
فالله على جرح المحبّه يعيني