تعال بوقد لك من ضلوعي شموع

ياملوّع(ن) قلبي من مفارقك لوع
وعندك على وصل المحبّه مناعه

تعال بسكب لك من ابياتي دموع
وإترك قصيدي في يمينك وداعه

تعال بوقد لك من ضلوعي شموع
وأجلس طلبتك داخل القلب ساعه

يمكن بعد ماتشوف حبي لك تموع
ثلوج صدّك والجفاء والقطاعه

ذبحتني محظور . مرفوض . ممنوع
كنّي ذنوب ولالقيت الشفاعه

وكن الجفاء في سلمكم شي مشروع
وكنّك تفنن في جفاك ببراعه

لاتحسب إنّي يوم انا جيتك خضوع
الحب عزّ ورفع راس وشجاعه

لكن اخاف تقوم في يوم مفزوع
وتلقى غلاك بقلبي أعلن وداعه

في وقتها حرام ماأنوي لك رجوع
ماهو تحدّي . بس راي وقناعه

عمر الهوى ماكان في حبّة الكوع
مغليك مايرضيه لويت ذراعه

وعمر الهوى ماقيس بالكمّ والنوع
تشوف في عين الهواوي شعاعه

ماهو تجارة بين شاري ومبيوع
وماظنتي تلقاه ضمن البضاعه

ولاهو صكوك(ن) بين مالك ومنزوع
ولاهو مواقف بين شيخ وجماعه

إمّا يجي بالطيب واللّين والطوع
وإلاّ بلاش من الهوى وإلتياعه