نزف دمي .. بعد دمعي - عادل آل زارع

دخيل الله يا عيني
**** دخيلك لا تبكّيني
 
 
 
نزف دمّي بعد دمعي
**** على الشّعب الفلسطيني
 
 
 
واشوف السالفه طالت
**** ولا به من مداعيني
 
 
 
سوى كم واحدٍ خاين
**** يذلّ آخوهِِ ويهيني
 
 
 
كذا هانت مئآثرنا
**** وخانوها السّلاطيني
 
 
 
وعشنا في زمن ذلّه
**** رَغَم إنّا ملاييني
 
 
 
أخونا يُقتلُ و يُؤسر
**** وعاره ضاع والدّيني
 
 
 
وطفله همّها زايد
**** بلا والد ولا امْعيني
 
 
 
أبوها مات في سجنه
**** وخلّف شيءّ من دَيني
 
 
 
وطفلٍ توّه اصغيّر
**** يصيح ايقول أنا ويني
 
 
 
وهيّ اتصيح يا وجدي
**** ونا منهو يداريني
 
 
 
كبر همّي على همّي
**** وزوّد هالبلا فيني
 
 
 
وحاله آآه من حاله
**** تزيد الجور والبيني
 
 
 
وحنّا نلعبُ و نضحك
**** ولا به من مواسيني
 
 
 
ألا يا كوبة الكوبه
**** شرفنا طاح فالطيني
 
 
 
عوالم عدّها تغلط
**** هواها بسّ غنّيني
 
 
 
ولبّسني على الموضه
**** ورقّصني وخليني
 
 
 
عرب حنّا عرب حنّا
**** فلحْنا فالمزاييني
 
 
 
شجبنا بعْد وانكرنا
**** وحاورنا المعاديني
 
 
 
تشدّدنا .. تحرّرنا
**** تلاعبنا على السيني
 
 
 
تلبرلنا .. تعلمنّا
**** تشّيعنا كما الصيني
 
 
 
لعن آآبوهاَ من حاله
**** وصرنا كالملاعيني
 
 
 
لعِب في لعْب يا أمّه
**** ولو صاحوا مناديني
 
 
 
فداك الكون يا غزّه
**** ومن هو ما ملا عيني
 
 
 
ومن هو حال من دونك
**** وحوّل بينكُ وْ بيني
 
 
 
ومدام الحال في وضعه
**** أبي إنّك تَِْعذْريني
 
 
 
ونا والله في ودّي
**** أجاهد لوّ بيديني
 
 
 
ولكن ما معي إلّا
**** دموع اليسْر والليني
 
 
 
أجل تدرين يا عيني
**** بنبكي واللهِ ايعيني
© 2023 - موقع الشعر