صاحب (( وقودهـ ))

يا صاحبي كلٍ ترى فِكره وقوده
نحو الرضا أو الزّعل حسب التّمنّي
 
***
وآآنا معا خلّي وحدي من حدوده
أمشي معه وآسايره في كلّ فنّي
 
***
بالطّيب يلقى طيب من عندي وأزوده
والغلطه الأولى أمشّيها .. وأغنّي
 
***
أقتل شرور إبليس والعين الحسوده
أطفي شرارة خافقه .. لا يمتحنّي
 
***
لكن تراها تنحسب بنقاط عوده
واحذر رصيدك يمتلي كِبر ُوتَجَنّي
 
***
آآنا حشمتك والحشيم اللي عهوده
الزّاد والعِشره بِلا مِنّه ومنّي
 
***
والنّذل بيّن فيه من تِركة جدوده
يبقى نذل لو قال لك إنّي .. وإنّي
 
***
الفعل عقدة صاحبه زوّد قيوده
إلين صار الحقّ عنده .. سوء ظنّي
 
***
إمّا كَذب ولاّ تلوّى في ردوده
ولاّ غمز ولاّ لمز أو .. حَنّ حنّي
 
***
ما كنّه إلا موترُ و ورعٍ يقوده
فجّر بساتم خافقه .. والعقل جَنّي
 
***
المرجله ما هيب في همزُ وبروده
ولاّ بلوتُ وحُكم تربيعه وصنّي
 
***
بعض العرب مغشوش في قوّة عضوده
لا يحسب إن المرجله لعبُ وتَحنّي
 
***
شوف الأسد عايش ومن حوله أسوده
حامي عرينه .. مستريحُ ومستكنّي
 
***
لا مشغلٍ باله ولا شيءٍ يكوده
صوته زئيرُ ... ولا عرَف مرّه يوِنّي
 
***
بالمختصر يا صاحبي كلٍ وهوده
هذا حديثٍ عابرٍ عنّك وعنّي
 
***
واحذر ترى البارق تجي بعده رعوده
ولاّ تراهِ ْبينقلب صاحبك جِنّي