مشاعري من غيبتك ما شكت لك - حسام مرزوق

وش به خفوقي يوم ضمّك سكت لك
ويومه تكلم كل نبضه تناديك

حتى القصايد من غلاتك تكت لك
واصدق قصيده قلتها جات بيديك

كنّك كما البيت العتيق ابركت لك
واستغفر الله يوم طافت حواليك

كل ما سلكتي وادي ٍ اسلكت لك
نفس الطريق اللي تماشيه رجليك

تمسّكت بك لين ماهي امسكت لك
مشاعر ٍ عن خافي القلب تنبيك

ومشاعري من غيبتك ما شكت لك
خافت عليك من المعاتب يأذيك

لكنّها والله ياما بكت لك
خلّت عزيز الدمع يتبع خطاويك

ضمّيتها في داخلي واتركت لك
دفتر قصيد وشاعر ٍ مايخليك

تركتها بالقلب حتى حكت لك
عمّا بقلب ٍ عاد له ميّت ٍ فيك

والا كفوفي | ..يووه..| ياما فركت لك
حسرة خفوق ٍ مالكه حيل يغليك

وان كان بالصدفه كذا اضحكت لك
هذي البليّه ياعسا الله ينجيك

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر