الخيال البكر

يسعد الله صباحك يَ الخيال البكر
أحتري جيّتك من مدّه تعيدها

غيبتك طالت و غيّبت معك الشعر
والقصايد براسي .. فك لي قيدهآ

كل شاعر على ماقيل صايد فكر
بس منهو حرار الفكر بيصيدها

يقنع الناس في شعره و يلفت نظر
من قراله قصايد يرجع يعيدها

وانا قانع ب اني لا مسكت الحبر
كل قصور الشعر يا سهل تشييدها

وش يهز الشعور الا مواقف تمر..!
في صميم الضلوع يتم تسديدها

ذاك عبدالله اللي معتكف له شهر
بعد شهرين ف السهرات عربيدها

كان كل شي حرام ٍ عنه يغض البصر
وصار يُخطف بصره بشعرها و جيدها

وذاك عبدالله اللي من صلاة الفجر
للعشا .. للفجر .. ماسك تقاليدها

غيروه بفكر ل محاربين الذكر
همهم كتم ايات الله و ترديدها

مكرفون المساجد .. في نظرهم مضر
قالوا اسباب عدّه .. لازم نبيدها

وذا وهذا وذاك .. و لا سبل للحصر
و زفرة انفاس .. تزحمها تناهيدها

في زمنا عجايب اشيا ما تنذكر
اشيا من كثرها يا صعب تحديدها

مر في خاطري لاهل القصايد شطر
شطر فكرته جتني .. مثل مَ اريدهآ

( يا زمان العجايب وش بقى ما ظهر)
قالها ( خالد الفيصل ) و انا اعيدها